വാഷിംഗ്ടണ്‍: ആഗോള ജനതയ്ക്ക് മാര്‍ഗദീപമാണ് ഇന്ത്യയെന്ന് യുഎസ് പ്രസിഡന്റ് ബരാക്ക് ഒബാമ. സ്വാതന്ത്യ്രദിനം ആഘോഷിക്കുന്ന രാജ്യത്തിന് നല്‍കിയ ആശംസയിലാണ് ഒബാമയുടെ അഭിപ്രായം. ചരിത്രത്തിലേക്ക് അഭിമാനത്തോടെ തിരിഞ്ഞുനോക്കുന്നതിനൊപ്പം തന്നെ ഭാവിയുടെ പുരോഗതിക്കായി മുന്നോട്ട് നോക്കുവാനും ഇന്ത്യയ്ക്ക് കഴിയണമെന്ന് അദ്ദേഹം പറഞ്ഞു. സ്വാതന്ത്യ്രം നേടിയ ശേഷം ഇന്ത്യയിലെ അഹിംസാമാര്‍ഗവും ജനാധിപത്യത്തിലുള്ള അടിയുറച്ച വിശ്വാസവും നിയമവ്യവസ്ഥയും ആഗോള സമൂഹത്തിന് പ്രചോദനമാണെന്ന് ഒബാമ വിലയിരുത്തി. ഇന്ത്യയുമായി തുടര്‍ന്നുവരുന്ന നയതന്ത്ര ബന്ധം നവംബറിലെ തന്റെ സന്ദര്‍ശനത്തോടെ കൂടുതല്‍ ഊഷ്മളമാകുമെന്നും ഒബാമ പ്രത്യാശ പ്രകടിപ്പിച്ചു.
